پاڵپشتینەکردنی دارایی بانکەکان لە کەرتی خانووبەرە، یەکێکە لە کێشە سەرەکییەکانی کەرتی نیشتەجێبوون، وەبەرهێنەران کردنەوەی لقی بانکە فیدراڵییەکان بە چارەسەری پاڵپشتیی حکومەت بۆ ئەو کەرتە دادەنێن، دامەزراوەی ڤیژن بۆ لێکۆڵینەوەی ستراتیجی چۆنێتیی هاندانی بانکەکان بۆ وەبەرهێنان لە کەرتی خانوبەرە دەخاتە گفتوگۆیەکی لایەنە پەیوەندیدارەکانەوە.
رۆژی ١١/٤/٢٠٢٦ دامەزراوەی ڤیژن بۆ لێکۆڵینەوەی ستراتیجی گفتوگۆیەکی کراوەی بۆ بەشێک لە وەبەرهێنەرانی کەرتی نیشتەجێبوون لە پارێزگای سلێمانی، بانکە ئەهلییەکان و لایەنە حکومییەکان ئەنجامدا، کە مەبەست لێی چارەسەرکردنی کێشەکانی رەهنی خانووبەرە و پاڵپشتیی داراییە بۆ ئەو کەرتە.
دامەزراوەی ڤیژن لە گفتوگۆکەدا کورتەی توێژینەوەیەکی لەو بوارەدا خستەڕوو کە لەلایەن دامەزراوەکەوە بڵاوکراوەتەوە و بەپێی ئەنجامەکانی توێژینەوەکە ١٩٢ هەزار یەکەی نیشتەجێبوون لە سلێمانی هەیە کە بەشێکی زۆری چۆڵە، لە کاتێکدا ٣٠ هەزار کرێنشینیش هەن و پێویستیان بە یەکەی نیشتەجێبوونە.
توێژینەوەکە باس لەو مەترسییانە دەکات کە لەسەر وەبەرهێنەرانی سلێمانییە و بەپێی داتاکانی ناو توێژینەوەکە، ٤٠٪ی کۆی وەبەرهێنەرانی سلێمانی تەنها یەک پرۆژەیان هەیە، کە ئەوەش وادەکات سەرمایەکەیان لەبەردەم ئاڵنگاریدا بێت و مەترسییان لەسەر بێت، ئەمەش بۆ چارەسەربوون پێویستی بە پێداچوونەوەی تەواوەتی سیستمی بانکی و پاڵپشتیی کەرتی خانووبەرە هەیە.
پێشنیازی وەبەرهێنەران بۆ پاڵپشتی و رەهنی خانووبەرە کردنەوەی بانکە فیدراڵییەکانە لە سلێمانی و پاڵپشتیکردنی حکومەتە وەک متمانەیەک بۆ کاری وەبەرهێنان و نەمانی مەترسی لەسەر سەرمایە و کاری وەبەرهێنان.
لە دیدارەکەدا باس لەوەکرا کە هەمواری یاسای وەبەرهێنان، زۆری دەسەڵاتی مۆڵەتدان و نەبوونی سندوقی نیشتەجێبوون بۆ پاڵپشتیی دارایی وەبەرهێنان کێشە سەرەکییەکانی ئەو کەرتەیە، دەبێت لەرێی بانکە حکومییەکان و مۆدێلێکی نوێی ئابوورییەوە چارەسەر بکرێت.