رۆژی شەممە 25 تشرینی یەکەمی 2025، دامەزراوەی ڤیژن بۆ لێکۆڵینەوەی ستراتیجی دیدارێکی لەشاری سلێمانی بەناونیشانی "پاش 20 ساڵ لە پەسەندکردنی دەستور،  لەکوێی فیدراڵی و لامەرکەزیداین لە عێراقدا؟ ئەنجامدا  کە تیایدا چەندین ناوەندی لێکۆڵینەوەی عێراق و هەرێمی کوردستان و ڕێکخراوەکان و کەسانی ئەکادیمی و پسپۆڕ و بەرپرسانی حکومی و زانکۆکان بەشدارییان کرد.

 سەرەتای دیدارەکە پاش سرودی نیشتمانی و دەقیقەیەک وەستان بۆ گیانی پاکی شەهیدان بە خوێندنەوەی وتاری عەدنان عوسمان سەرۆکی دامەزراوەی ڤیژن دەستپێکرد کە باسی لەگرنگی جێبەجێکردنی دەستور کرد وەک بنەمایەک بۆ دەوڵەتێکی سەقامگیر و چەسپاندنی فیدڕاڵی و لامەرکزی لەعێراق پاشان ئەو پرسەی خستەڕوو کەئایا پاش 20 ساڵ لەپەسەندکردنی دەستور  ئێمە لە کوێی فیدڕاڵی و لامەرکەزیداین.  

دیدارەکە سێ پانێڵی لەخۆگرتبوو، پانێڵی یەکەم بە ناونیشانی (پاش 20 ساڵ بەسەر پەسەندکردنی دەستور: پێگەی فیدراڵی و لامەرکەزیەت لە نەخشەی سیستمی حکومڕانی) بوو  کە پانێڵیستەکان بریتی بوون لەبەڕێزان د.یوسف محەمەد سەرۆکی پێشوتری پەرلەمانی کوردستان،  د. رێزان سەعید لەزانکۆی هەڵەبجە، هاوڕێ تۆفیق راوێژکار لە سەرۆکایەتی کۆمار و د. عەلی غریفی بەریوەبەری دیداری بەحر ئەلعلوم لە نەجەف و پانێڵەکە لەلایەن چۆمان محەمەد بەرێوەچوو. 

پانێڵی دووەم ( لە ناکۆکییەوە بۆ هاوبەشی: بەراوردکارییەکی شیکاری بۆ پەرەپێدانی سیستمی فیدراڵی لە چوارچێوەی گۆڕانکاری بەرەو دیموکراسی) و پانێڵیستەکان بریتی بوون لەبەڕێزان د.مستەفا سەرای بەریوەبەری بەشی لێکۆڵینەوەکان لە سەنتەری بەیان لە بەغدا، د. عەبدولحەکیم خسرەو سەرۆکی فەرمانگەی هەماهەنگی و بەدواداچون لەحکومەتی هەرێم و ئەندامی وەفدی دانوستکار لەگەڵ بەغدا، د.بەهار مەحمود پارلەمانتاری پێشوی عیراق ، د.وائیل مونزر لێکۆلەر لە سەنتەری رواق بەغدا و زەردەشت خالید پانێڵەکەی بەرێوەبرد.

پانێڵی سێهەم بەناونیشانی (دامەزراوە دەستورییەکان لەژێر چەتری سیستمی فیدراڵی: رۆڵ، دەسەڵاتەکان، سنوری کارەکانیان) هەریەکە لە د. مازن زەیدی سەرۆکی سەنتەری  ئەلمەساری عێراقی ، سەربەست ئامێدی لێکۆلەر و بەریوەبەری رێکخراوی ستێپ، د. جەلال حەسەن راگری کۆلیژی زانستە رامیارییەکان لەزانکۆی سلێمانی بەشداربوون و د.سانا کەمال پانێڵەکەی بەرێوەبرد.

لە سەرجەم پانێڵەکاندا ، میوانانی بەشداربوو بیروڕا و سەرنجەکانییان خستەڕوو ، دواتر پێشنیاز و ئەنجامەکان و ڕاسپاردەکان لەلایەن د. دیدار عەبدولکەریم-ەوە خوێندرانەوە.