دامەزراوەی ڤیژن دیدارێکی سەبارەت بە پێکەوەژیانی پێکهاتەکان بەبەشداری کەسانی پەیوەندیدار لە شاری سلێمانی ئەنجام دا، تیایدا گفتوگۆیەکی تایبەت، پانێڵێک و گفتوگۆیەکی کراوە بەڕێوەچوو. 
رۆژی شەممە، 22-ی شوباتی 2025، دامەزراوەی ڤیژن بۆ لێکۆڵینەوەی ستراتیجی، پانێڵێکی سەبارەت بە "پێکەوەژیانی ئاشتییانەی پێکهاتەکان لە شاری سلێمانی"، بەبەشداری بەرپرسانی باڵای حکومی، نوێنەری پێکهاتەکان، ڕێکخراوەکان و پسپۆڕان لە گراند میلینیۆم لە شاری جوان لە سلێمانی ئەنجام دا. 

چالاکییەکە لە سەرەتادا بە خوێندنەوەی وتاری هەریەک  لە بەڕێزان: عەدنان عوسمان، بەڕێوبەری دامەزراوەی ڤیژن، د.هەڤاڵ ئەبوبەکر، پارێزگاری سلێمانی، د.موحسین ئەدیب، بەڕێوبەری گشتی ڕۆشنبیری وهونەری سلێمانی دەستی پێکرد. 

دواتر گفتوگۆیەکی تایبەت لەنێوان بەڕێز. قوباد تاڵەبانی، جێگری سەرۆکی ئەنجومەنی وەزیران و بەڕێز عەدنان عوسمان بەڕێوەچوو، تێیدا باسییان لە سیاسەتی یەکێتی نیشتیمانی کوردستان بەرامبەر پێکهاتەکان کرد و باسیش لە پەیوەندی تایبەتی بەڕێز قوباد تاڵەبانی لەگەڵ پێکهاتە جیاوازەکانی شاری سلێمانییدا کرا، جگە لەوە چەند مژارێکی دیکەش خرانەبەرباس کە بریتیبوون لە: سەردانی شاندی ئیمڕاڵی بۆ لای یەکێتی و پارتی و پرۆسەی ئاشتی لە تورکیادا، گفتوگۆ داراییەکانی نێوان بەغداد- هەولێر و دواکەوتنی مووچە و چارەسەرکانی و هەروەها بابەتی پێکهێنانی کابینەی دەیەمی حکومەتی هەرێمی کوردستان. 

دواتریش، پانێڵێک بەبەشداری سێ پانێڵست بەڕێوەچوو کە پێکهاتبوون لە: مەریوان نەقشبەندی- چالاکوان لە بواری پێکەوەژیان، دیلان لەتیف پۆلس- نوێنەری کڵێسای ماریوسف، د.سامان حسێن- پسپۆڕی بواری مێژوو، ئەلەند مەحوی- جێگری بەڕێوبەری دامەزراوەی ڤیژن پانێڵ و گفتوگۆکانی بەڕێوەبرد. 

لە درێژەی چالاکییەکەدا، میوانانی بەشداربوو بیروڕا و سەرنجەکانییان خستەڕوو، بڕیارە پێشنیاز و ڕاسپاردەکان بکرێنە پۆلیسی پەیپەر و توێژینەوەیەکیش لەسەر "پێکهاتەکان لە شاری سلێمانی" لەلایەن د.سامان حسێن ئەنجام بدرێت.