هەڵکەوتەی جوگرافیای عێراق و هەرێمی کوردستان، نەبوونی سەروەریی لە ئاسمان و خاک و بڕیار هەروەها لاوازیی هێزی سەربازیی عێراق و هەرێمی کوردستان، ئەو بارەیان سەپاندووە بەسەر عێراق و هەرێمی کوردستاندا کە نەتوانن بێلایەنی هەڵبژێرن و نەبنە بەشێک لە جەنگی نێوان ئەمریکا و ئیسرائیل لە لایەک و ئێران لەلایەک.
رۆژی ١٢/٣/٢٠٢٦ دامەزراوەی ڤیژن بۆ لێکۆڵینەوەی ستراتیژی گفتوگۆیەکی کراوەی بە ناونیشانی "عێراق و هەرێمی کوردستان ( پێشهات و ئاکامەکانی جەنگی ئەمریکا و ئیسرائیل بۆسەر ئێران )"، بە ئامادەبوونی پسپۆڕ و شارەزایانی سەربازی و سیاسی و بە بەشداری ناوەندەکانی لێکۆڵینەوەی رواق و نەهرەین لە بەغداد و ناوەندی لێکۆڵینەوەی رووداو لە هەولێر و ناوەندی لیکۆڵینەوەی هەرێمی لە زانکۆی موسڵ لە رێگەی زوومەوە، ئەنجامدا.
لە گفتوگۆکەدا جەختکرایەوە، کە بژاردەی بێلایەنی کە ئێستا لەلایەن عێراق و هەرێمی کوردستانەوە باسی لێوەدەکرێت، تەنها لەچوارچێوەی راگەیەندراودایە، چونکە عێراق و هەرێمی کوردستان پەلکێشدەکرێتە ناو ئەم جەنگەوە بەبێ ویستی خۆی.
لەهەمانکاتدا، جەخت لە پاراستنی عێراق و هەرێمی کوردستان کرایەوە، لەرێگەی پاراستنی پەیوەندییە نێودەوڵەتییەکان و هەوڵدان بۆئەوەی ببێت بە ناوچەیەک بۆ چارەسەر و نێوەندگیری نەک دژایەتی هیچ وڵاتێک.
یەکێکی تر لە پرسەکانی گفتوگۆکەی دامەزراوەی ڤیژن، کاریگەرییە ئابورییەکانی ئەم جەنگەیە، باسلەوەکرا کە پێدەچێت عێراق بەرەو داڕمانی ئابوری بڕوات و ئەگەر داخستنی گەرووی هورمز درێژەبکێشێت، عێراق تووشی کارەساتی ئابووری دەبێت.