قوباد تاڵهبانى لە لوتکەی سلێمانی: كێشهى دارايى، بازاڕ و بژێوى تهنیا به حكومهت چارهسهر ناكرێت و كارێكى دهستهجهمعييه
21 ئەیلوول 2026
قوباد تاڵهبانى، جێگرى سهرۆك وهزيرانى ههرێمى كوردستان له وتارێكيدا كه له لوتكهى سلێمانى 2026 پێشكهشی كرد رايگهياند؛ ساڵانی رابردوو سلێمانی گەشەکردنێکی زۆری بەخۆیەوە بینیوە لە بواری ئابووری و لە بواری وەبەرهێنان و لە بازاڕی کار و لە هەلی کارەوە، نهك ههر ئهوهنده بهڵكو له بوارى هونهر و كولتوور و گفتوگۆى فیكريش گهشهيهكى بهرچاوى بهخۆوه بينيوه.
ئهوهشى خستهڕوو كه کێشەی ئابووری تەنیا بە حکومەت چارەسەر ناکرێت و وتی: "کێشەی دارایی و کێشەی بازاڕ و کێشەی بژێوی ژیانی کۆمەڵانی خەڵکی کوردستان و عێراق بە حکومەت چارەسەر ناکرێت بە تەنیا؛ کارێکی دەستەجەمعیيه و بە خەڵکی شارەزا، بە فکر، بە موناقەشە، بە ڕەخنە، بە داهێنان، بە پێکەوە کارکردن چارهسهر دهبێت".
دهقى وتارهكهى بهڕێز قوباد تاڵهبانى، جێگری سەرۆک وەزیرانی هەرێمی کوردستان:
بەڕێز سەرۆک کۆماری عێراق، برای بەڕێزم سەرۆکی هەرێمی کوردستان، بەڕێز وەزیری پەیوەندییەکان، ئامادەبووانی بەڕێز، ئەم کاتەتان باش، گوێمان لە دوو وتاری زۆر بەنرخ بوو و سەرتان نایەشێنم بە وتارێکی دوورودرێژ مەترسن!.
هەر ئەوەندە دەڵێم: دەستخۆشی لە برای عەزیزم کاک عەدنان ئەکەم، دەزگاکەیان، بە کار و چالاکییەکانیان لە ماوەیەکی زۆر کەم توانیویانە جێی خۆیان بکەنەوە لە کوردستان و لە سلێمانییەوە بۆ باسکردنی بابەتە هەستیارەکان و بابەتە هەنووکەییەکان کە پێویستن باس بکرێن.
خۆشبەختانە، وەک خۆشی ئاماژەی پێدا، تەنها باسی بابەتەکان ناکەن، بەڵکو چارەسەریش پێشکەش دەکەن بۆ بابەتەکان و هیوادارین کە لەم لوتکەیەدا، موناقەشەکانی کە دەکرێن، پرسەکانی کە باس دەکرێن و کێشەکانی کە گفتوگۆیان لەسەر دەکرێت، دەرەنجامێکی هەبێت، راپۆرتێک بێت یان چەند راپۆرتێک بێت، کە ئێمە لای خۆمان لەناو حکومەت، خوشک و برایانی پەرلەمان، بتوانن گفتوگۆی لەسەر بکەن، یاسای لەسەر دەربکەن، بڕیاری پێویست و شیاوی لەسەر دەربکەن لە پێناوی بووژانەوەی کەرتی تایبەت و بازاڕی کار و هەلی کار و بووژانەوەی عێراق بەگشتی و هەرێمی کوردستان بەتایبەت.
لە لایەکی تریشەوە زۆر دڵخۆشم کە لە ساڵانی رابردوو سلێمانی گەشەکردنێکی زۆری بەخۆیەوە بینیوە لە بواری ئابووری و لە بواری وەبەرهێنان و لە بازاڕی کار و لە هەلی کارەوە، بەڵام لەوە دڵخۆشترم کە تەنها لەوە گەشەی نەکردووە دەبینین لە بواری هونەر و کولتووردا، پایتەختی رۆشنبیری پێناسەکەی خۆی بەخۆیەوە گرتووەتەوە و رۆژ لە دوای رۆژ کار و چالاکی هونەری دەبینین و هۆڵی شانۆکان پڕ بوونەتەوە و فیلم گەشە دەکات و بواری هونەر و کولتوور گەشە دەکات.
بۆیە دووبارە و سێبارەش خۆشحاڵترم کە لەپاڵ گەشەکردنی ئابووری هەرێمی کوردستان و گەشەکردنی هونەر و کولتوور لە کوردستان و لە سلێمانی، کەشێکی داهێنەرانەش دەبینین لێرە، کە گەنجەکانمان بە سوودوەرگرتن لە تەکنەلۆجیای ئەمڕۆ، بە سوودوەرگرتن لە ژیریی دەستکرد، بە سوودوەرگرتن لەوەی کە لە جیهاندا دەگوزەرێت، سلێمانییان کردووە بە پایتەختی داهێنان و کارسازی.
تەنیا لەوەش نەوەستاوین؛ لەپاڵ ئەم کەرتانە کە ساڵ لە دوای ساڵ و رۆژ لە دوای رۆژ گەشە دەکەن، ئەوەی کە خۆشحاڵترمان دەکات ئەوەیە کە بواری موناقەشەی فیکریش گەشەی کردووە، لە لووتکە و کۆنفرانسەکانی کە ئەنجام دەدرێن، بە ئامادەبوونی بەڕێزان لە حکومەتی فیدراڵ و بە ئامادەبوونی سەرۆک کۆمار و وەزیرە بەڕێزەکانی فیدراڵی و بەرپرسانی هەرێمی کوردستان، چونکە کێشەی ئابووری تەنیا بە حکومەت چارەسەر ناکرێت؛ کێشەی دارایی و کێشەی بازاڕ و کێشەی بژێوی ژیانی کۆمەڵانی خەڵکی کوردستان و عێراق بە حکوومەت چارەسەر ناکرێت بە تەنیا؛ بە کارێکی دەستەجەمعی چارەسەر دەکرێت. بە خەڵکی شارەزا، بە فیکر، بە گفتوگۆ، بە رەخنە، بە داهێنان، بە پێکەوە کارکردن.
بۆیە سەرتان نایەشێنم و خوا سەرتان نەیەشێنێت، دەستخۆشیتان لێ دەکەم و هیوادارم کۆنفرانسێکی سەرکەوتوومان هەبێت و ئێمەش چاوەڕێی دەرەنجامی ئەو کۆنفرانسە دەکەین کە ئینشاڵا بتوانین بیکەینە بەشێک لە کاری پێویستمان لە حکومەت و پەرلەمان و دامەزراوە فەرمییەکان.
هەر شاد و سەربەرز و سەرکەوتوو بن، بەخێر بێن.
بڵاوکردنەوە